قالت له بصوتها الناعم الحنون وبشيء من الدلع
حبيبي شفت أمك شو جابت هدية لمرة أخوك عشان البنوتة الجديدة
و دون ان يرفع رأسه وعيناه ملتصقتان بالجريدة
هو: لاء يا حياتي شو جابت؟
هي : حلق ذهب بيجنن " مع التشديد على حرف الجيم"
هو : والله امي ما في منها
هي : طيب بتتزكر شو جابت إلنا لمن اجتنا سوسو أو حتى أي واحد من أولادنا
هو : لا والله مش متزكر
هي : اها حبيبي مش متزكر والا ما بدك تعترف انها ما جابت النا شي
هو : حبيبتي والله العظيم مو متزكر ... بتعرفيني زاكرتي مو متل زاكرتك
كمبيوتر "مع التشديد على حرف الكاف" بعدين يمكن ما كان معها فلوس وقتها
هي : طيب احكيلك شو جابت امبارح امك لمرة اخوك التاني عشان عمليتها
هو : اها شو جابت؟
هي : حِرام شتوي تقيل مع بيجاما الها " مع التشديد على حرف الهاء "
هو : الله يطول عمرها امي شو بتحب تعطي وكريمة
هي : اوك حبي طيب بتتزكر وئت الي انا اعملت العملية شو جابتلي
هو : وعيناه لم ترتفع عن الجريدة
لا يا عمري انا مش متزكر شو اتعشيت امبارح
هي : ولالالالالالالالا شي " طبعا واضح على شو التشديد"
هو : ...
هي : تنقر باصابعها على الطاولة
هو : .......
هي : تزداد اصابعها نقرا ليصبح ضجيجا
يرفع أخيرا نظره من على الجريدة
هو : حبيبتي مالك في شي؟؟
هي : بدي افهم ليش عمتي بتعمل هيك !!؟
هو : شو عملت خير فهمني !؟
هي : وقد اصبح صوتها اقل نعومة وراح الدلع
ما انا عم بحكيلك شو أنت مش معي ! ليش امك ما بتجيب النا هدايا في مناسباتنا
مع إني أنا اكتر وحدة بجيب الها هدايا وحتى اسألها ورح تحكيلك صح
هو : يا حبيبتي والله امي بتحبك اكتر وحدة بعدين أنتي بنت أخوها
يعني أنتي إلي لازم اتجيبيلها
هي : اوك حبي انا ما بقصر معها وانت بتعرفني منيح بس ليش هي عم تتعامل
معنا وكأنو هي امريكا و نسوان اخوتك اليهود وانا المسلمين
ليش ما تعاملنا كلنا متل بعض ... يا بتجيب للكل يا إما بلا
هو : ههههههههه ما أحلاك وأنتي معصبة وعم تضربي أمثلة سياسية
هي : وقد أصبح صوتها كصفارة الإنذار
أحمى ما عندي ابرد ما عندك ولا على بالك
هو : يا حبيبتي من عقلك عم تحكي جد أنتي مهتمة بهدية سخيفة
هاد وأنتي الجامعية المثقفة الواعية شو خليتي للناس المتخلفة
هي : وقد أصبح وجهها يغلي كأنه بركان على وشك الانفجار
شو شايفني انجنيت يعني!؟ شو دخل التعليم بقصص متل هيك ...نعم انا
جامعية متعلمة فهمانة بطيخ مبسمر بس أنا بضل مراة عارف شو يعني مراة
هو : وأحلى مراة بالدنيا
هي : اتهرب ..اتهرب من الموضوع ...أنت بس فهمني ليش هي بتعمل معي
انا بالزات هيك بدي افهم... بس افهم ليش بتجامل الكل الا احنا !؟
هو : حبيبتي أنا صارلي معاكي 13 سنة ولسى مش فاهمك .. بدك ياني افهم ليش
امي عم تعمل هيك ... والله انا ما بفهم بقصص النسوان ... طب احكيلي انتي ما
انتي على الحساب بتفهمي اد بلد
هي : اه طبعا انا بفهم ,,, بس هاي بالزات مش فاهماها
هو: يا عمري لشو هالاهتمام بهدية على الاغلب مش رح تعجبك
هي : والله مش مهم تعجبني المهم الشعور " مع التشديد على حرف الراء"
بعدين هاي امك لازم تكون بتفهم على تصرفاتها
هو : انا لا بفهم عليها ولا فاهم عليكي وانا اصلا ما بفهم .. حبي خودي هاي فلوس
روحي اشتري حلق ذهب وبيجاما وحرام والي بدك ياه وحلي عني منشان الله
هي : مذهولة وبعصبية شديدة
يعني انت بس هاد الي افهمته ! اني بدي هدية وخلص! ...والاهتمام ... الفضول.. الحب
التبادل... التعامل ...المشاعر ...الاحترام ...المجاملة ... مروا عليك شي !!؟؟
هو: والله انا وامي وكلنا بنحبك والهدية مش مقياس
هي : وقد وصلت لمرحلة الانفجار ... مش مقياس!!! لكان شو هو المقياس عندك
في هيك حالة ... أنت من طول عمرك هيك لا بتفهم عليي و لابتحب تناقشني
ولا تاخد وتعطي ولا حتى بتحس فيي
هو: يا حبيبتي شو صارلك !؟ مش انتي الي تغاري من نسوان إخوتي وأنتي بتعرفي
انك أحسن منهم بكل شي ...شو بدك بأمي اتجيب هدية وإلا ما تجيب هي حرة أنا
بجيبلك إلي بدك ياه بس خلص سكري هالموضوع
هي : وطبعا خلص انفجر البركان ... أنا !! " مع التأشير بإصبع الشاهد "
فلانة بنت علان خريجة أحسن الجامعات تحكي عني هيك ... هلاء انا صرت غيرانة
أنا !! ... انا اغار!؟ مين هاي الي انا اغار منها!؟ ... وعلى شو اغار شو انسيت
مين انا بنت مين انا .. انسيت المستوى الي كنت عايشتو ببيت اهلي ... وانسيت اديش
متت لحتى ارضيت فيك ....الخ " الاسطوانة اياها"
هو : اه ه ه يا ريتك ما رضيتي
هي : والحمم البركانية تتطاير من وجهها ... شوووو ..شو عم تحكي ...
يا سيدي لسى ما فات الأوان ..........
هو: يا حبيبتي مالك صلي على النبي الموضوع مش مستاهل لا تكبريه
هي: لاء مستاهل ليش ما بدك تفهمني ليش ما تصارحني ؟
هو: بشو اصارحك شو انا مخبي شي يعني !؟
هي: والله ما بعرف هاي امك وانت ادرى فيها وبتصرفاتها
هو : خلص بكرة بتصل فيها .... والا احكيلك لاء ما بتصل بروح لعندها وبسألها
وبستفسر منها وبحاول افهملك الموضوع ولالالالالا يهمك
هي : لاء ما تسألها رح تعرف إني أنا حكيتلك
هو: حاضر متل ما بدك وانسينا من هالموضوع أبوس ايديك
هي : ما صدقت حضرتك ... ..بعرف أسلوبك حافظته عن غيب ...
أنت ليش ما بدك تتفهم إني إنسانة إلي مشاعر ومهما كنت جامعية وبفهم وما بعرف
شو ... بس ممكن إني اشعر للحظة باشوية غيرة ... بالنهاية أنا مراة بس مو الغيرة
إلي أنت فاهمها
هو : خلصينا عاد بتغاري والا ما بتغاري ؟
هي : بصوت مدوي كانه انفجار في بغداد
يعني هلا قلبت الموضوع وصار موضوعنا انا بغار... والا ما بغار
طيب وامك .. امك الي ولا بعمرها جاملتنا باي مناسبة بالله شو اسمو هاد
هو: والله اسمو انه امي الها حق علينا مش العكس
هي : ما اختلفنا بس لشو التمييز والكيل بمكيالين
هو : هههههههههههه
هي : اضحك اضحك مهو انا عم نكت
هو: على وشك أن يشد شعره " مع انه شبه أصلع "
طب شو اعمل فلوس ما بدك احكي معها ما بدك نسكر الموضوع ما بدك
اضحك ما بدك ...يا عالم يا ناس ياااهو ... شو بدها مرتي منشان الله فهموني
....................................................................................
احبتي القراء ممكن احد منكم يساعد هذا الرجل ويفهمه ماذا تريد زوجته ..
وممكن احد منكم يفسر لزوجته تصرفات حماتها.
دمتم بخير
أمل م.أ
